ఎల్బీనగర్ ఖిల్లా మైసమ్మ, జియాగూడ మహంకాళి ఆలయాల్లో పోచారం శ్రీనివాసరెడ్డి ప్రత్యేక పూజలు
హైదరాబాద్, ఆగస్టు 9 (V59 న్యూస్): ఆషాఢమాసం సందర్భంగా హైదరాబాద్లోని ఎల్బీనగర్ ఖిల్లా మైసమ్మ ఆలయంలో నిర్వహించిన బోనాల మహోత్సవాల్లో తెలంగాణ రాష్ట్ర ప్రభుత్వ వ్యవసాయ సలహాదారు, బాన్సువాడ నియోజకవర్గ శాసనసభ్యులు శ్రీ పోచారం శ్రీనివాసరెడ్డి, ప్రభుత్వ విప్, వేములవాడ నియోజకవర్గ శాసనసభ్యులు శ్రీ ఆది శ్రీనివాస్ ముఖ్య అతిథులుగా పాల్గొన్నారు.
ఈ సందర్భంగా ప్రభుత్వం తరఫున ఖిల్లా మైసమ్మ అమ్మవారికి పట్టు వస్త్రాలు సమర్పించి, ప్రత్యేక పూజలు నిర్వహించారు. అనంతరం అమ్మవారిని దర్శించుకుని రాష్ట్ర ప్రజల సుఖసంతోషాలు, సుభిక్షం కోసం ప్రార్థించారు.
అనంతరం జియాగూడ సబ్జీ మండి మహంకాళి ఆలయ కమిటీ ప్రత్యేక ఆహ్వానం మేరకు నిర్వహించిన మహంకాళి అమ్మవారి బోనాల పండుగలో పోచారం శ్రీనివాసరెడ్డి పాల్గొన్నారు. ఆలయానికి చేరుకున్న ఆయన అమ్మవారిని దర్శించుకుని ప్రత్యేక పూజలు నిర్వహించారు.
ఆలయ ప్రాంగణంలో ఆలయ గజరాజు గజమాలతో పోచారం శ్రీనివాసరెడ్డికి ఘన స్వాగతం పలికింది. గజరాజు ఆశీర్వాదం అందుకోవడం భక్తులను ఆకట్టుకుంది.
ఈ సందర్భంగా పోచారం శ్రీనివాసరెడ్డి మాట్లాడుతూ, తెలంగాణ సాంస్కృతిక వైభవానికి ప్రతీకగా నిలిచిన బోనాల పండుగను రాష్ట్ర ప్రభుత్వం అత్యంత ప్రతిష్టాత్మకంగా నిర్వహిస్తోందని తెలిపారు. తెలంగాణ సంప్రదాయాలు, ఆచార వ్యవహారాలను పరిరక్షిస్తూ భవిష్యత్ తరాలకు అందించేందుకు ప్రభుత్వం కట్టుబడి ఉందన్నారు.
అమ్మవారి ఆశీస్సులతో తెలంగాణ రాష్ట్రం మరింత అభివృద్ధి పథంలో ముందుకు సాగాలని, రైతులు సుభిక్షంగా ఉండాలని, ప్రతి కుటుంబంలో ఆనందం వెల్లివిరియాలని ఆకాంక్షించారు. ప్రజల సంక్షేమమే ప్రభుత్వ ప్రధాన ధ్యేయమని పేర్కొన్నారు.
బోనాల పండుగ సందర్భంగా ఆలయాల వద్ద భక్తుల రద్దీ నెలకొంది. మహిళలు సంప్రదాయబద్ధంగా బోనాలు సమర్పించగా, భక్తులు అమ్మవారిని దర్శించుకుని మొక్కులు చెల్లించుకున్నారు.
- ఈ కార్యక్రమాల్లో స్థానిక ప్రజాప్రతినిధులు, నాయకులు, అధికారులు, ఆలయ కమిటీ సభ్యులు, భక్తులు పెద్ద సంఖ్యలో పాల్గొన్నారు.
